„Frisia non cantat“ off „Frisia kann dat“?

Darstellung von Ludwig Kittel (1921)

Dor denkt man ja all lang över nao, ick ook, amenn kann ick toeminsten för mi doröver watt finnen. Ick fraog mi, wo Tacitus dorup komen is, dat mutt hum doch well vetellt hebben, hä sülst is doch noit in Oostfräsland west.

Wo is mi dat gaohn?  Gaff dat än plattdütsch Lied, wat  in Schoel sungen wur? Wo was dat in dä Familien? Wiehnachten wur sungen, man dornao was dat woll nich mehr völ. Hett hä doch recht, dä oll Tacitus?  Mit well hett hä vergleken, hä mutt dat doch ook anners beleevt hebben…

Un ditt anner kunnen wi beleben, wenn wi dusend Kilometer nao Süden fuhren . Wi wüssen uns Wunner k

ien Enn, wat uns dor överkwam. Överall wur sungen, in Hus, in Wirtschaft, Mannlü sungen värstimmig, elker lötje Dörp har än ägen Gesangverein, elkunän kunn Lieder utwennig, un nich toe minn,  mit all Strophen...dat was än Vermaok antoehören. Ick wät nich, off datt in Italien ook so was, man Tacitus har amenn hier än Tiet verbrocht un dat Singen kennenleert. Dor brukde hä nich soeken, dor kwamm hum alls toemoet.

Wenn man dat mit Fräsland, sien Frisia, verglieken dee, full dat int Nörden man maoger ut.

Mäände Tacitus dat?

Mutt wi hum recht geben?

Ick will versoeken, än paor Lieder toe finden, dä in Frisia sungen wurden, dä echte Volslieder sünd un nich van bekannte Dichters schreben wurden.

Dat ollste Lied wur um 1600 upschreven, man dat kennt bold nüms mehr, is än Danzlied. Bi dä Auerker Danzkoppel kann man dat noch hören un sähn.

„Buske di Remmer, di lose Moon, de friede sein Wuf woll sogen Jere.

Un as die segen Jere ume weren, noch friede hie“.  Dat Lied hett acht Strophen.

Dat mutt woll noit up platt sungen west wesen, dit is woll frääsk, wat man amenn int Saoterland versteiht.

Ick hebb hör nich nao dä Schoelen henbrocht (Ballade van 1579, ut Westfalen)

Dor wassen twä Königskinner

Trina, koom maol vör dä Doer

Gaoh van mi

Wenn hier än Pott mit Bohnen steiht

Van Maiborg nao Nortmoer

Jan, koom, kiddel mi

Ick un mien Lisbeth

Lütt Anna Susanna

Burlala

Jan Hinnerk wohnt up dä Lammerstraot

Kiekebusch

O Danneboom

Dat du mien Lävste büst

O sore Winter

Kenn ji all dat näje Lied“

Dat sünd paor Lieder, dä mi nett so in Kopp komen, un än off anner kennt dä ook, man worden dä ook sungen? Dor staohnt ook noch än büllt annern in Liederboeken, un dorvan gifft dat än häl Rieg.

Weglaoten hebb ick dä Lieder, van dä man wät, well dä dicht hett. Denkt man bloot an Klaus Groth

dä wunnerbaore Gedichten schreben hett, un dorvan worden änige ook sungen.

Än paor dorvan kann man in mien Blog finden.

Dat Ostfräsen-un dat Noordsäwellenlied hören dor ook noch toe.

Ick bünn nu bloot van mi utgaohn, van Beruf her kenn ick Hunderte van Liedgoed, man fragt man junge Lü, off sä drä dütsche Lieder upnoehmen köhnen, denn sücht dat man trurig ut, un bi Platt kummt dor nix. Freien kunn ick mi, wenn dä än off anner mi tegenproten kunn, ick wull geern, wenn dat anners was.

Nu kummt weer dä Fraog, watt Tacitus woll mähnt hett, „Frisia non cantat“?  Friesland singt nicht?

Off könen wi tegenhollen : „Friesland kann datt?“  Hä sall nich maol in Frisia west hebben. un upschreben kann man dat ook nich finnen.

Worvan will hä dat denn wäten? Well hett dat up Padd brocht?

Wat män ji?