Eilert, maok Tee...

Oma hett noch än Döntje parat. "Wi haren in Naoberskup än Schoester, dat was häl gaodelk, man wi mussen faoken häl lang wachten, bit uns Schoe klaor wassen, un dat kwam so. Unkel Eilert was häl mietsam, man sien Ollske dürs dr woll wesen. Dä häle Dag gung dat "Eilert hier, Eilert dor," hä har mit umlopen Wark goed toe doen. Dat moiste was, wenn dr Versiet kwem, Tant Groenfeld prackeraode sück in Hörn, namm dat Loetje ut dä Waeg, ook wenn dä schleep, ant Bost dermit, un denn reep sä :" Eilert maok Tee, ick sitt mit Kind." Noch vandaog segg wi, wenn wi'n Kaat up Schoot hebben, off mit Tuffelkiepke sitten: "Well maokt Tee, ick sitt mit Kind". Dat gifft alltied wat toe laagen, Eilert und sien Ollske worden nich vergeten! 

Mit Ball spölen

"Oma, du hest mi wat belooft" "Och nee,Kind, doch nich allweer än Vertellsel, dor kann ick mi nich up besinnen." "Ick woll, Oma, is doch Sönndag, du geihst nich in Tuun, du hest Tiet". "Ja, wenn dat so is, wat man belooft, mutt man ook doen, laot mi mi besinnen...än lötje Vertellsel hebb ick noch. Dat geiht um uns Naoberske. Sä was läp stolt, dat sä dütsch proten kunn un muß dat alltiet anbrengen. As änes Daogs dä Wichter mit hör Ballen spölden, wat hör woll bietje toe voel wur, see sä: Geht nach Noord zu zu kaasken, da ist mehr Bott. Dä Spröök leevt bit vandaog in uns Familie, is alltied wat toe laagen".

Dä Biene

"Oma, hest du noch än Vertellsel för mi? Kann ookn häl lötje wesen". Oma mutt lagen, "Du kannst dor läp än van maoken, dat du dien Will krichst. Denn hör man toe. Ick har än lötje Cousine, proten kunn sä all, man sä kreg dat mit platt un dütsch noch nich vörnanner. Wi nömden hör Puppi, man sä mook dor Pui van, was nich so stur toe seggen. Änes Daogs kwamm sä anflägen un reep :" Is Biene auf Tafel, hat Pui Not vor." Ick wät nich mehr, wo faoken sä dat noch hören muß".