Mieghämkes int Hus...

Moin Gretchen,

hest du int Vörjaohr ook Last mit Mieghämkes int Hus? Dä hebben bi mi hör Nüst woll unnert Hus, man sä komen bloot in Tuun. Enn van Feberwoi kriegen sä Gelüsten, mähnen, in mien Koeken is watt toe haolen. Dor mutt ick hör alltiet än P vörsetten! Sä komen dör dä Gang int Koeken, un denn mutt ick uppasen, dat dor kien Krömmel herumliggt, wat dä Kundschafters vermelden kunnen. Do is mi watt in Kopp komen! Ick hebb up än Stück Papp än groot Haart maalt, dat binnen mit Hönnig bestreken un denn in Gaang up hör Straot stellt. Dat harst du sähn sullt ! Mit än Knickschlag kemen sä in Sprang anlopen! Dat dürde nich laang, denn was dat häle Haart vull mit Mieghämkes, un kienän kwamm mi int Köken! Dat was moj antoekieken. So hebb ick disse Tiet goed överstaohn. Dat wassen ook man värtein Daog.

An än off twä Daogen in Meert kemen denn int Achtergang noch ut Locken int Foetböhn dä Mieghämkes mit Flögels. Dor hebb ick denn dä Butendör open staohn laoten, un in än Umkieken wassen sä all weg. Sä mussen ja hen toe fräjen! Ickhebb mi dor all tiet än Gügel ut maokt! Än ollt Huus hett völ antoebäden!

Moin,Gretchen,

Du kannst di dor seker up besinnen, dat mien Mama dä letzte Jaohren bi mi in Hus hör Kaomers har. In hör Koeken har sä ook Last mit dä Mieghämkes, sä kwammen van unnern up hör Offwaschke. Nu har sä dor än Melodie up funnen, wo sä dä gau weer losworden kunn. Wenn sück dä erste Dären sähnleten, kloppte sä mit än Lepel off Mest up dat Metall, un dor kunnst du nich tegen kieken, denn wassen sä dr vandör. Laang hull dat ja nich an, bloot wenn sä dor stunn, man biet Arbeit har sä hör Ruh. Wenn sä nich in hör Köken was, stellde sä än Schöddel mit Zucker int Padd, dor gungen dä Mieghämkes mit dä Körels dr vandör, kunnst haost nich tegen kieken. So gung dat, un änes Daogs was dä Spoek vörbi!