Kaat un Muus

Moin, Gretchen,

nu kann ick di noch än Döntje vertellen, wat mien Mama klaorbrocht hett, wenn dat um Dären in Huus gung. Sä kunn kien Tiek dootmaoken, Spinnen wurden infangen un nao buten brocht!

Man nu gung dat nich um Spinnen un Tieken, nu gung dat um än lötje Mus!

Dä har sück dat anwennt, dor, wor dat Heizungsröhr dör dä holten Foetboen in Unnergrund leep, än Lock toe finnen. Hör was woll dä Goer vant Köken in hör lötje Nös trucken. Dat was so än Plesär, wenn sä dor vandag kwamm, häl stillkens, sä wüß ja nich, wat hör överkomen kunn.

Man denn wur sä trankiel un stappde up dä Teller mit Kattenfreten toe. Dat was för Mamas Pußi, schmook dä lötje Muus ook woll goed. Sä fratt dor nich völ van, namm än Brecki in hör Schnutje un gung drmit vandör, wor sä herkomem was, seker sörgde sä all vör dä Winter.

Änes Daogs satten min Mama un ick moj bi Tee int Sofa, do kwamm dat Där ook weer vandag.  Man….dat kunn nich goed gaohn, up Fensterbank schleep Pußi!  Van dat Gerökel wur sä wacker un keek um sück toe. Uns blev dä Aohm staohn!  Man wat geboerde, du loewst dat nich...nix. Pußi, naodem sä hör Puckel maokt har, settde sück hen un keek sück dat Spillwark van boben an!

Dat is doch än Kaat, dä geiht doch achter Musen an!

Dat har wi uns so docht, man nix drvan, nich uns Pußi!  Sä wüß, dä Mus was lang unnert Eer, wenn sä sück groot ückern dee.

Nu satt wie dräi dor un bekeken, wat noch geboerde.

So gung dat toe bi mien Mama int Koeken!

Moin Gretchen,

ick hebb noch wat vergeten.. mien Mama har noch än Mus, nich in Koeken, man in hör Schlaopkaomer!  Dor kwamm off un ann ook än Mus bi hör up Versiet, har ook än Drei funnen, wo sä nao boben Kwam. Dor was nu kien Pußi, dä hör ant Fell wull, dat har sück seker ook all rumproot bi dä Musenfamilie, Musen bünt fien!

Nu har mien Mama dor än anner Drei up funnen, sück dat Däär nich toe naoh komen toe laoten, int Bett much sä dä nu doch nich lieden.

Sä hett än Schöddel mit Brekkis up Grund stellt, dicht bi dat Lock, wor dä Mus utkeem. Nu har dä dat häl gaodelk, muß nich lang soeken, un mien Mama har hör Aorigkeit dor an. Noit is hör än Mus övert Gesicht lopen...dat is mi gbört, in mien Butze, ick was eben nich so schlau as mien Mama!

Musenvertellsels gifft datt nich meer, man wacht man off, mit Mamas Dären is noch kien Enn!