Dä Zeeg is lebät...

Moin, Gretchen, ick hebb mi lang nich hören laoten bi di, man du wäst ja, dat ick Halswark toe doen hebb mit all mien Vähtueg, dor komen alltief weer all bi. Du kennst dat ja, wo dat bi uns toegeiht. Dat Spillwark mit uns Kaoter hest du ja mitkregen, dä häl Naoberskup was besörgt um dat Där, man nu ist ja all in Rieg.

Nu mutt ick di noch vertelln, wat mi mit uns Zeeg geboert is. Dä har ja än moj Huck in Tuun, was ook goed toefree. Man änes Daogs hörde ick snachts vör mien Fenster än Schandaol, dat was so luut, dat ick dorvan upwaokt bün. Bit ick dor achter kweem, datt dat uns Zeeg was, vergung än Tiet, ick kwamm ja so ut Schlaop. Wat was gebört? Dä Dör van dat Huck was woll nich häl dicht west, un dat Där is in Regen herumboestert, Gott wäät, wo lang. Ick murk, datt dat Där all an hoesten un knüchen was. Nu stunn sä unnert Offdack, wi beid wüssen nich , wo wi drmit ansullen. Nu har ick maol lesen, datt Zeegen nich natt worden düssen! Watt bleev dr van nao? Ick muß nao buten un dat Där offdrögen, leet sück dat ook gefallen.  Man wo an mit dat Hoesten un Knüchen? Bi Menschken helpt Kamellentee, denn sall dat bie Zeegen woll kien Schao wesen. Dat Där hull mi toegang!  Ick hebb än Pott vull Kamellentee maokt, ook bietje Hönnig dorin daon, is ook goed tegen Verkolln!  Man nu muß ick dä Zeeg beproten, datt sä dat ook upsuten muß.

Dor hörde wat toe!   As sä murk, dat dat warm was, hett sä bloot in dä Emmer herumpruust, dä Tee spütterde an Boen un Balken. Nu was ick mit mien Latein an Enn, hebb offwacht, bit dä Tee offkoelt was. Un….segg dr wat van naoh, dä Zeeg hett dat all upsopen, was woll än Leckerbeck. Ick was dörklömt, hebb mi än häte Bollstoov maokt un bün weer int Bedd gaohn. Vörheer hebb ick dä Zeeg weer in hör Huck brocht un mit Hüselband dä Doer fast toebunnen. Mi is van dä häl Spektaokel nix överkomen, un bi dä Zeeg is ook nix naohbleben. So kannt lopen, wenn man alles upnimmt, wat än so toelöppt !