Arme Ritter

"Oma, sall ick uns vanaobend wat Leckers tö eten maoken?" "Wenn du mänst, dat du dat kannst, denn man toe. Du wäst, dat ick man kör bün, denn mutt dat all wat worden. Ick sett mi in Hörn un kiek toe." "Nee, Oma, dat geiht nich, gaoh du man in Upkamer, kannst dat Fehntjer Blatt ja mitnehmen. Ick haol Törftast van Deel, mutt dä Obend ja noch uptunnern. Gaoh mi unnert Foeten weg, seggst du ja alltied. Dat, wat ich maoken will, hebb ick bi di noch noit hatt, woll bi Mama, mit Kanäl, un bi mien Fründin

mit Zucker. Nu wäst du än bietje, wat up di toekummt." "Ick gaoh di all ut Padd, Läv, bün blied, datt ick bietje Still hebb, mak Dören toe." "Denn kann ick nu anfangen, kann alles in Köken finnen, bün seker in än halv Stünn klaor! .......Oma, du kannst komen, steiht klaor up Taofel. "Kind dat ruckt so lecker naot Upkaomer hen, ick hebb Schmacht kregen." "Nu sett di an Taofel, ick vertell di datt, is nich stur. Brot in Schieben schnieden, in än Teller mit Melk un Ei leggen, goed Botter in Pann, Schieben dor in leggen, braoden van beide Sieden, up Tellers un Kanäl un Zucker doröver...probär, off du dat machst." "O, wat lecker, Läv, dat hest du goed maokt." "Dat freit mi, Oma, un wäst du watt? Ick kann nu faoker för di koken, wenn du krank off möj büst....ick kann ja noch mehr, rug Tuffels, Spiegelei, kokt Ei, Nudels, Karmelkbräi, un denn haol ick än drögt Mettwust vant Spill, un denn ...." "Schei ut, Kind, laot uns eten, uns 'arme Ritter' sall nich kolt worden!" "Du kennst dat ja , Oma, denn eet wi dat nu faoker!" "Jao, Kind, man än Fraog is dr nu noch...well waschket off?"